Imbatad ti Philippine National Police (PNP) a dagiti menor de edad a naarestar ti naranggas a tignay-protesta kontra korapsyon idi Setyembre 21 ket nasken a maipasidong ti rehabilitasyon ken counseling.
Kinuna ni PNP acting chief Lt. Gen. Jose Melencio Nartatez Jr., a dumanon ti 55 ti bilang dagiti menor de edad ken aganay 25 a natataengan ti naarestar ken nawayawayaan metlaeng kas maiyannurot iti linteg, partikular ti Juvenile Justice and Welfare Act.
Segun kenni Manila Mayor Isko Moreno, dagiti menor de edad ket kasapulan a maiturong idiay Manila Department of Social Welfare tapno mangiyuswat ti community service kas kadagiti cleanup drives a paset met iti rehabilitasyon, reintegration, ken diversion da.
Kabayatanna, impaganetget pay ni Nartatez a napateg iti accountability ngem nasken latta iti proper guidance ken rehabilitasyon para kadagiti agtutubo.
Pinaregta ti kapulisan dagiti nagannak, guiardians, ken dagiti lokal nga opisyales nga agbalin nga aktibo iti panangtaripato kadagiti agtutubo tapno maliklikan ti kapada nga insidente inton masakbayan.
Para met kadagiti naarestar a 25 a natataengan, binilin ni Nartatez dagiti imbestigador nga agtignay para iti prosekusyon tapno masiguro ti pannakaipila kadagiti maiyannatop a kaso.
