Nakasaganan dagiti sumagmamano a pampubliko a pagadalan ditoy La Union a mausar para inton May 9, 2022 Elections.
Segun ken ni Mr. John Philip Boado, ti Information Technology Officer ti Schools Division Office of La Union, daytoy ket babaen iti napintas a panagsagsaganada kadagiti kangrunaan a pagadalan a posible a pakaiyuswatan ti polling precincts.
Inbatadna a nakasagana payen dagiti mangisursuro nga agserbi kas Board of Election Inspectors kalpasan a dimmalan dagitoy ti nagdumaduma a panagsanay tapno maliklikan ti aniaman nga aberya a mapasamak.
Inlawlawagna nga awan met pay ti naituding nga aldaw a sumangpet dagiti Vote Counting Machines kadagiti pagadalan ngem dagus a maisayangkat ti testing and sealing tapno maipasigurado met laeng a nasayaat ti kondision dagitoy.
Inpakaammona nga adda ti 314 elementary school, 96 junior high school ken 85 senior high school ditoy probinsia ngem dagiti laeng central schools ti kangrunaan a pakaiyuswatan ti panagbubutos.
Mainaig iti daytoy, kunana kas tarigagay ni Atty. Donato Balderas Jr., Schools Division Superintendent a nasken laeng a maipakat dagiti health safety protocols kabayatan ti panagpipili tapno maliklikan a makaptan ti COVID-19.
Maipalagip a nasuspinde ti klase dagiti amin a pampubliko a pagadalan mangrugi inton Mayo 2 agingga 13 gapu kadagiti maangay nga aktibidad nga adda ti pakainaiganna iti May 9 Elections.
