LA UNION – Nakasaganan iti San Fernando City Police Station ken iti La Union Police Provincial Office (LUPPO) iti maipatungpal a seguridad ken re-routing para iti nakatuding nga installation ti baro nga obispo ti San Fernando City, La Union inton bigat, Agosto 2, 2018.
Daytoy ti imbatad iti Bombo Radyo La Union ni Fr. Nolan Nabua, parish priest ti St. Michael the Archangel Parish idiay ili ti Bacnotan.
Kinuna ni Fr. Nabua a namnamaen iti nairut a seguridad a maipatungpal inton bigat gaputi manamnama a panagdar-ay iti adu a papadi manipud naduma-duma a lugar, malaksid laeng kadagiti deboto a katoliko.
Mangrugi ti programa agarop alas 9:00 ti agsapa, iti mismo a St. William Cathedral.
Ni Fr. Daniel Priesto, manipud probinsiya ti Zambales, iti dinutukan ni Pope Francis kas baro a bishop iti San Fernando City, La Union ken maibilang a maika-6 a bishop ditoy syudad.
Ni Fr. Priesto iti sumukat iti puwesto nga imbati ti pimmusay a ni Bishop Rodolfo Beltran, a nangidaulo iti diocese iti uppat a tawen sakbay a natay iti sakit idi napan a tawen.
