(Update) LA UNION – Narigat a mabigbig iti kinasiasino dagiti suspek a riding-in-tandem, a nangpaltog iti maysa a negosyante ken mannalon, bayat a mang-mangan daytoy kadwa ti driver na, iti maysa a karinderya idiay Barangay Camilo Osias, Balaoan, La Union.
Iti eksklusibo nga interview ti Bombo Radyo La Union kenni Victor Galano, driver ti biktima a ni Ernesto Oriñe, nakasuot ti helmet ken nangisit a jacket dagiti dua a suspek.
Insalaysay pay ni Galano, a naklaat iti pasamak ken saan payen a pulos nakapagsao ti biktima agsipudta natay a dagus kalpasan a nagsagaba ti fatal gunshot wounds, partikular iti ulo, barukong ken tiyan daytoy.
Naamwan a nairaman ni Oriñe iti maysa nga insidente ti pammaltog idi tawen 2011, ket maysa daytoy a kitkitaen a motibo dagiti otoridad.
Kabayatanna, lalo pay a limmidem ti namnama a mabigbig iti kinasiasino dagiti suspek agsipudta naamwan nga awan ti nakamuntar a CCTV camera iti lugar a nakapasamakan ti krimen.
