BR LA UNION – Naalarma dagiti residente nangruna dagiti asideg iti baybay idiay Barangay Pilar, Sta Cruz, Ilocos Sur gaputi kellaat a panag-asideg ti dalluyon ti baybay.
Iti video a nai-share iti social media, makita nga immasideg ken sinaplit ti napipigsa a dalluyon iti baybay iti pasdek ti maritime police a nakabase iti nasao a lugar.
Napasamak daytoy agarop alas nuebe idi rabii.
Makita pay iti nasao a video, a limbes pay ti dalluyon ti baybay iti nasao a pasdek.
Saan pay nga ammo nu anya ti makagapo ti ngimmato a sea waves iti nasao a lugar.
Maipalagip nga immunan nga imballaag ti NDRRMC ken Office of Civil Defense iti posibilidad a tsunami iti kabaybayan ti Ilocos Sur partikular idiay ili ti Santa Catalina, gaputi nagsasaruno a panagdayyeg iti uneg ti kabaybayan.
