LA UNION – Nagpalagip ti Department of Agarian Reform (DAR) kadagiti landlords maipapan iti wagas ti panagbingay iti apit kadagiti mula kangrunaan ti pagay.
Daytoy ket kalpasan a dalapusen iti bagyo nga Ompong ti Amianan a Luzon.
Iti pannakiuman ti Bombo Radyo kenni Atty. Lobayto Lang-ay, Chief ti Legal Division iti DAR La Union Provincial Office, kinunana a no nasurok a 75 percent dagiti nadadael a mula kadagiti taltalon ket saan a nasken a makibingay dagiti landlords kadagiti tenant farmers, base iti sagudayen ti linteg.
Saan met a kayat a sawen daytoy kinunana a malibre dagiti mannalon gapu ta kasapulanda iti sumubbot ken mangted iti 25 percent a parte ti produkto kadagiti sumagsaganad a panagapit para iti maikin-daga.
Ngem, no mas nababbaba iti 75 percent ti nadadael a mula ket kasapulan nga ited ti tenant farmers iti parte ti landlord.
Pinalagipan met ni Atty. Lang-ay dagiti tenant farmers a saanda koma a baybay-an iti daga nga intalek kadakuada ti landlord lalo no agtartarigagay dagitoy a temporaryo nga agsapul ti sabali a pagtrabahuan kalpasan a dinalaposda iti bagyo.
Mabalin met kinunana a temporaryo nga italek iti pamilya wenno asideg a kabagyan ti daga kabayatan nga adda daytoy iti sabali a trabaho tapno agkakwarta para iti paggatang ti kanguruaan a kasapulan. (Absalom Flores)
