LA UNION – Intuloy ti demolition team ita nga aldaw, Oktubre 29, a rak-raken dagiti dadduma pay a babbalay a sakop ti pribado a lote idiay Barangay Baroro, Bacnotan, La Union.
Iti eksklusibo nga interview ti Bombo Radyo La Union iti maysa a residente a ni Ms. Rosalla Dacanay-Madrigal, kinuna na nga in-inut nga ag-move on da, awaten ti kinapudno, ken mangnamnama a makabirok da iti pudno a lote a makuna a kukua da.
Aminado ni Madrigal a natural laeng ti agbalin nga emosyunal nangruna nu marakrak iti balay a dimmackelan ken nangibusbosan ti nagbalin a birok ti nagannak na a nagturong iti sabali a pagilian, malaksid laeng dagiti naragsak ken kalalagip a bonding ti pamilya.
Kinuna pay ni Madrigal a dagiti 39 a nakaawat ti pinansiyal a tulong nga umabot ti P26-k ket dagiti most in need wenno indigent bayat a dagiti nasurok 30 ket agtultuloy ti assessment ti Municipal Social Welfare Development Office.
Iti agdama, temporaryo nga immakar dagiti naapektaran a pamilya iti igid ti baybay wenno ruar iti nasao a pribado a lote, idinto a ti dadduma ket nagrenta, naki-dagus ken immakar pay laeng iti cacabagyan da, bayat nga agbir-birok dagitoy iti sabali a lugar a temporaryo wenno permanente a pagnaedan.
Maikadwa itan nga aldaw iti pannakaipatungpal ti demolisyon, maiyannurot iti court order, iti aganay 66 a babbalay iti nasao a lugar ket agtaltalinaed a nakabantay dagiti otoridad.
Kabayatanna, iti inisyal nga impormasyon, kas kinuna ni Madrigal, iti aganay 17 nga ektarya a lote ket maipagarop nga i-develop ti maysa a dackel a kompanya ditoy Pilipinas.
