Impasiguro ti Department of Budget and Management nga umdas ti pondo ti gobierno para kadagiti sumaruno a didigra a sumangpet ditoy pagilian.
Segun kenni Budget Secretary Amenah Pangandaman, adu ti paggapuan ti pondo ti gobierno isu nga awan ti pakadanagan ti publiko.
Inaramid ti sekretario ti pananglawlawag kalpasan nga imbaga dagiti kritiko ti administrasion a naibusen ti pondo ti gobierno a mangsungbat kadagiti masanguanan a didigra.
Kaaduan kadagiti kritiko iti mangikonkonektar iti agsasaruno a bagyo kasta met iti EL Niño phenomenon a nagraira iti pagilian ken isu iti kinapudno a nangibus iti pondo ti gobierno.
Inlawlawag ti sekretario a dumanon iti ₱30 billion ti Quick Response Fund dagiti nadumaduma nga ahensia ti gobierno pakairamanan ti DSWD, DPWH, DA, DEPED, DILG, PNP, DOTR, BFP, OCD ken DOH.
Innayon met ti opisial nga adda pay ₱7 bilion a Quick Response Fund a nabati nga usaren dagiti ahensia iti tarigagayda a mangsungbat kadagiti didigra.
Daytoy a gatad ket nabati manipud iti pondo a nairuar kas sungbat kadagiti bagyo Kristine, Leon, ken Marce.
Ti ₱7 bilion a pondo ket mabalin nga alaen manipud iti Unprogrammed Appropriation, Contingent Fund, ken Local Government Support Fund.
