Aktibo pay laeng ti wildfire iti historic town a Lahaina idiay Maui, Hawaii.
Segun kenni Bombo International News Corespondent Paul John Castillo, 60-80% iti contained itan a wildfire idiay Maui, ngem peligro latta dagiti dadduma a wildfire a saan pay a naan-anay a nasebseban.
Istorya ni Castillo, dagiti lugar a maur-uram pay laeng idiay partena ti Lahaina ken dadduma pay a paset ti Maui ket narigat a maserrek dagiti responders ken firefighters, gaputi kinarigat ti pagnaan wenno saan nga accessible.
Umaboten kunana ti 106 dagiti natay ken lima kadagitoy iti nabigbigen.
Nupay kasta, dua pay laeng iti nairuar ti naganna, agsipudta kasapolan a maipaka-ammo pay nga umuna iti maseknan a pamilya dagiti tallo sakbay a mairuar ti kinasiasino dagitoy.
Dagiti dua a bangkay a nabigbigen ket isuda: Robert Dyckman, 74-anyos ken Buddy Jantoc, 79-anyos.
Pakabuklan metten a 207 nga istruktura iti dimmapo a pakaibilangan dagiti 86 a residential buildings.
Umabot pay laeng ti aganay 30% iti nasukimat dagiti otoridad iti disaster site, segun kenni Governor Josh Green.
Posible kunana a madoble pay ti nasao a bilang dagiti natay iti sumaruno a 10 nga aldaw.
Kabayatanna, imbaga ti White House a nakatuding nga agturong ken bumisita idiay Hawaii inton Lunes da US President Joe Biden ken First Lady Jill Biden .
Nangrugi ti deadly wildfire idi Agosto 8.
