Nakarekobre ti Philippine Coast Guard (PCG) kadagiti debris ti rocket a markado ti People’s Republic of China (PRC) iti kabaybayan a masakopan ti Sitio Gunting, Barangay Bonbon, ken Lubang, Looc, Occidental Mindoro idi Agosto 14, agdama a tawen.
Segun iti PCG, maysa a lokal a mangngalap ti nakakita dagiti tumtumpaw a debris ken dagos na met daitoy nga impadamag iti Philippine National Police-Maritime Group (PNP-MARIG).
Nangisayangkat iti retrieval operation ti Coast Guard Sub-Station (CGSS) Lubang kabinnulig dagiti kameng ti Barangay Binacas ken ti Provincial Disaster Risk Reduction and Management Office (PDRRMO) Lubang Sub-Office.
Dagiti debris ket nagtaud manipud iti impatayab ti China a Long March 7A rocket idi Hulyo 15–17. Addaan daitoy iti 10 a kadapan a kaakaba ken 14 a kadapan ti kaatiddog na; naaramid babaen ti alloy ken addaan iti bandera ti China. Naiturong iti nasao a debris idiay Sitio Balaguin, Barangay Maliig para ti umiso a disposisyon.
Nagpalagip iti PCG kadagiti mangngalap ken residente a dagos nga ipakaammo iti kaasetgan a Coast Guard station ti aniaman a mapagduaduaan a banag makita iti baybay.
