Babaen ti botos a 177-0 ket inaprobaranen ti House of Representatives ti 3rd and final reading si singasing a gakat para ti kaadda ti mekanismo ken basaran ti panangideklara ti state of imminent disaster ken nu kasatno a makaipaay ti maiyannatop a sungbat iti gobierno.
Kinuna ni Speaker Ferdinand Martin G. Romualdez, principal author ti House Bill No. 11430, a panggep ti gakat a maliklikan ti kaawan ti pagbiagan, pannakadadael dagiti sanikua kadagiti panawen ti didigra, aramid man iti tao wenno natural.
Impunto ni Speaker Romualdez a ti Pilipinas nga adda iti Pacific typhoon belt ket tinawen a pagdaldalyasatan dagiti 20 a babagyo a masansan a mangigubgubuay ti nalawa a perdisyon para ti aktibidad ti ekonomiya, pagbiagan, ken pannakatay dagiti umili, gapo paylaeng ti climate change a mangpakpakaro kadagiti didigra.
Ik-ikkan ti House Bill 11430 ti Presidente ti bileg a mangideklara ti State of Imminent Disaster kadagiti barangay, ili, ciudad, probinsya, wenno rehiyon usar metten ti impormasyon manipud ti National Disaster Risk Reduction and Management Council (NDRRMC).
Mabalin pay a mangideklara ti local chief executive (LCE) babaen ti executive order ken rekomendasyon ti lokal a DRRM council wenno state of imminent disaster ti hurisdiksiyon da.
Babaen ti deklarasyon, mabalin nga usaren ti national ken local DRRM council ti bukod da a rekurso ken mekanismo tapno isayangkat dagiti addang a maliklikan dagiti didigra.
Siasinoman nga aglabsing ket mabalin a madusa ti pannakaibalud ti innem a tawen ken maysa aldaw agingga 12 a tawen wenno multa manipud ₱50K agingga ₱500K, wenno agpada a pannusa, depende ti desisyon ti hukom.
Dagiti opisyales met ti gobierno a matiliwan ket madusa ti perpetual disqualification of public office.
