Kasadon ita nga aldaw ti panangrugrugi ti deliberasyon ti Kamara ti singasing a pondo a P6.793-T para iti tawen 2026.
Alas-9:30 ti biag ita nga aldaw ket umawat ti House Committee on Appropriations iti briefing manipud kadagiti miembro ti Development Budget Coordination Committee (DBCC) seknan ti kasasaad ti ekonomiya ti Pilipinas ken dagiti macro-economic assumptions nga inusar ti administrasyon iti panangbukel ti 2026 National Expenditure Program (NEP).
Karaman kadagiti mangisayangkat ti briefing ket isuda Budget Secretary Amenah Pangandaman, Economic Planning Secretary Arsenio Balisacan Jr., Finance Secretary Ralph Recto, ken ti Bangko Sentral ng Pilipinas Governor a ni Eli Remolona Junior.
Manamnama met a sumango ni Speaker Ferdinand Martin Romualdez kadagiti miembro iti komite nga idadauloan ni House Appropriations Committee Chairperson ken Nueva Ecija Representative Mika Suansing.
Sakbayna ket inwaragawagen ni Romualdez dagiti lima a reporma ti budget nga inlatag ti Kamara tapno agbalin a transparent ti deliberasyon pakairamanan ti panangikkat ti inawagan na kas “small committee” a mangas-asikaso kadagiti institutional amendments kasta met iti panangilukat dagitoy kadagiti kameng ti media ken iti publiko.
Imbitado payen dagiti civil society groups, people’s organizations, ken pribado a sektor kadagiti maangay a budget hearings. Mapapigsa payen ti oversight function ti Kamara iti panangipatungpal ti budget ken ti panangipamaysa iti panagpuonan a makatulong iti panagbiag dagiti Pilipino.
