BR LA UNION – Naukag iti house hearing nga indaulwan ti Committee on Good Government and Public Accountability iti susik ti sumagmamano nga opisyal ti Department of Health ken Philippine Health Insurance Corporation (PhilHealth).
Segun kenni Iloilo First District Rep. Janette Garin saan a maresolba dagiti dadackel nga isyu nu iti uneg mismo ti ahensiya ket adda dagiti saan a panagkikinnaawatan.
Impaganetget ti mammamnday linteg nga anyaman ti saan a panagkinnaawatan dagiti kameng ti departamento, napateg a maituloy ti naannayas a serbisyo kadagiti umili.
Binalakadanna iti tagapagsarita ti Department of Health a ni Dr. Albert Domingo nga aramiden a nasayaat ti trabaho ken saan a rumbeng a malaokan kadagiti personal nga isyu.
Kabayatanna, dagiti umili met laeng ti maapektaran iti kanito nga umadu pay dagiti ospital nga umikkat gapu iti sumagmamano a sistema ti philhealth a dehado dagiti pribado nga ospital.
Segun kenni Representative Wilbert Lee, napateg a kitaen nu maiparbeng dagiti nasao a sistema ti government health insurer.
Para kenni Lee, sayang laeng dagiti maar-aramid ken manay-nayunan a benipisyo nu awan met laeng ti mabalin a pagturongan dagiti miyembro gaputi panag-panaw dagiti pribado nga ospital iti sidong ti philhealth coverage.
