BR LA UNION – Inruar ti Department of Health (DOH) idi kalman, Domingo, Marso 9, dagiti baro a pagannurotan tapno malapdan ken mataming ti epekto ti nakaro a pudot iti salun-at, maiyannot iti bilin ni Presidente Ferdinand Marcos Jr.
Iti baro a pagannurotan, a nakailanad iti Department Memorandum No. 2025-0114, imbilin ti DOH kadagiti amin a unit-na, agraman dagiti ospital ken health facilities nga imatmatonan dagiti departamento, kas iti “New Urgent Care” ken “Ambulatory Services (BUCAS) centers”, a mangipatungpal iti istratehiya kontra iti nakaro a pudot.
Nabilin pay a makikoordinarda kadagiti lokal a gobierno babaen kadagiti programa ti ”PuroKalusugan”, a naiyam-ammo kabayatan ti National Health Sector Meeting.
Karaman pay kadagiti pagannurotan ti panangsigurado ti kinasagana dagiti pasilidad ti salun-at ken staff ti gobierno, panangisaknap iti pannakaammo iti salun-at tapno ma-edukaran ti publiko no kasano nga agbalm a natalged iti nakaro a pudot a mapaspasaran ti pagilian, ken panangibangon kadagiti cooling centers kadagiti air-conditioned wenno ventilated areas nga asideg kadagiti ruta ti pampubliko a transportasyon.
Bayat a maipangpangruna dagiti nataengan, babassit nga ubbing, masikog, ken tattao nga addaan ti kapansanan.
Malaksid dayta, maipasdek iti hydration stations kadagiti amin a pasilidad ti DOH, nangruna iti kapudotan nga oras ti aldaw manipud alas 9 ti bigat agingga alas 4 ti malem, ken maipatungpal ti pannakaduktal ken pannakamonitor dagiti sakit a patauden ti nakaro a pudot.
Kabayatanna, kinuna ni DOH Secretary Teodoro Herbosa a nakasagana ti ahensiya a mangtaming iti nakaro a pudot ti panawen ken binalakadanna dagiti Pilipino a kanayon a kitaenda ti heat index forecast ti PAGASA (Philippine Atmospheric, Geophysical and Astronomical Services Administration) kadagiti masakopan a lugar.
Impalagipna pay a kanayon nga agsuot iti nalawlaw a kawes, puraw, ken nalag-an a kawes ita a napudot ti panawen.
Naaramid dagiti addang ti DOH kas panagsagana para iti nabarbara pay nga aldaw, a nairanta a mangsalaknib iti salun-at ti publiko ken mangipasigurado iti panagsagana mainaig iti ngumatngato a temperatura iti intero a pagilian.
