Aminado ni Education Secretary Sonny Angara nga adda ti nagbalin a panagkurkurang ti implementasyon ti Senior High School (SHS) curriculum babaen ti K-12 program ngem kinunana a ti Kongreso laeng ti addaan bileg nga agdesisyon nu maituloy pay ti programa wenno saanen.
Daitoy ket kasaruno ti singasing a gakat nga impila ni Senate President Pro Tempore Jinggoy Estrada a panggep nga ikkatenen ti SHS gapo ta napaay iti programa a makapartuat ti job-ready graduates.
Babaen ti Senate Bill No. 3001 ni Estrada, insingasing na a maisubli ti kindergarten, innem a tawen para ti elementarya, uppat a tawen ti high school, ken maikkaten ti Senior High School.
Maipalagip a 12 a tawenen ti napalabas idi maipasa ti Republic Act No. 10533 wenno ti Enhanced Basic Education Act of 2013.
Segun met kenni Angara, para ti School Year 2025–2026 ket mangisayangkaten ti Department of Education (DepEd) ti pilot implementation ti baro a SHS curriculum kadagiti 841 a pagadalan.
Kinunana a saan a nagbalin a napintas ti implementasyon ti programa ti napalabas a dekada gapo ti kinaadu dagiti asignatura ken kaawan ti independencia dagiti estudyante para ti panagpili ti agbalin a subjects da.
Sakbayna ket impaganetget pay ni Senador Sherwin Gatchalian a nasken a tungpalen ti K-12 program ti orihinal a panggep na a pabassiten ti college education babaen ti panagkissay kadagiti maul-ulit a subjects ti kolehiyo.
