Agtalek ni Department of Education Secretary Sonny Angara a tapno mapasayaat ti kaledad ti edukasyon ti Pilipinas ket kasapulan pay a pasayaaten ti panagsagana ken suporta kadagiti mannursuro.
Daitoy ket kas maibasar metten iti immun-una a direktiba ni Presidente Ferdinand Marcos Junior a reporma babaen ti Teacher Education Council a nairanta tapno masolbar ti nabayagen a problema ti sistema ti panagsagana ken panagsanay.
Segun iti report ti konseho idi Agosto 4, dagiti karit a makitkita ti pangadal ket ti teacher preparation, licensing, ken professional development a nakaro a makaaap-apektar iti kaledad ti edukasyon.
Mangrugi ita a tawen ket agbalinen nga operational ti Teacher Education Council Secretariat a buklen ti DepEd, Commission on Higher Education, Technical Education and Skills Development Authority, Professional Regulation Commission, ken National Commission for Culture and the Arts.
