Maragsakan iti liderato ti Department of Education iti panangideklara ti Supreme Court a Constitutional ti K-12 Program.
Iti pannakiuman ti Bombo Radyo La Union kenni Cesar Bucsit, public information officer ti Department of Education Region 1, kinuna nga no adalen iti pannakaipatungpal ti Republic Act 10533 wenno iti Enhanced Basic Education Act of 2013 a mas am-ammo kas K-12 program ti gobyerno dakkel nga tulong ti ipaay daytoy kadagiti agad-adal.
Immuna ditoy, ibilang dagiti nagannak itay kallabes a ti K-12 program ti gobierno ket kanayunan a parigat kadakuada nangruna iti dua nga tawen iti panagadal dagiti annak dagitoy.
Nupay kasta, inlawlawag ni Bucsit a ti kangrunaan a konsepto ti K-12 corriculum ket maipaayan dagiti estudyante iti gundaway a makapili kadagiti bukod da nga paglaingan a daytoy ti mangigiya kadakuada para iti mas nasaysayaat a masakbayan.
Innayon na pay nga apaman maturpos ti maysa nga estudyante iti K-12 ket mabalinen daytoy a makaipatakder ti bukod nga pagsapolan wenno ituloy na ti agadal agingga iti kolehiyo.
Maipalagip, imbasura ti Korte Suprema iti amin a petisyon kontra iti K-12 program gapu ti pannakapaay dagiti petitioners nga paneknekkan a linabsing ti linteg iti 1987 Constitution ken inaramid dagitoy nga adda grave abuse of discretion.
Iti desisyon nga insurat ni Associate Justice Alfredo Benjamin Caguioa, nakalanad nga indeklara met a ligal ti SC iti Republic Act 10157 wenno ti Kindergarten Education Act a nangiramn iti kindergarten kas paset iti basic education ken mandatory requirement tapno makastrek ti maysa nga estudyante iti Grade 1.
