BR LA UNION – Napinget ti panagsagana ti Department of Education (DepEd) Region 1 para iti masungad a 2026 Regional Athletic Association (R1AA) Meet, a manamnama a paka-awisan ken pakipasetan iti aganay 15,000 nga atleta, coaches, opisyal, nagannak, sports enthusiasts, ken dadduma pay a sangaili manipud iti nadumaduma a probinsiya ti rehiyon.
Maisayangkat ti Regional Athletic Association (R1AA) Meet idiay Candon City, Ilocos Sur manipud Abril 5 agingga 11, 2026.
Iti press conference ti Department of Education Region 1 idi kalman Marso 17, 2026 napagsaritaan dagiti addang nga aramiden tapno masigurado ti kinatalged iti amin a makipaset ken agbalin a naannayas iti sporting event babaen ti nainget a koordinasyon kadagiti lokal a gobiyerno, iti puwersa ti pulisiya, traffic management ken masiguro ti napaspas a medical response.
Imbaga pay ti DepEd nga adda umdas a pondo para iti pannakaipatungpal dagiti aktibidad, pakairamanan iti pagdagusan, taraon, transportasyon, ken dadduma pay a kasapolan dagiti delegado.
Para ita a tawen, adda iti 28 nga sporting events a pakipasetan dagiti atleta manipud iti elementarya, idinto nga 44 para iti secondary level.
Karaman kadagiti baro nga isports a nainayon iti kompetisyon ket ti weightlifting, football, ken futsal, kas paset ti pannakapalawa iti gundaway para kadagiti addaan ti potensiyal nga student-athletes.
Impaganetget ni Regional Assistant Director Rhoda T. Razon ti Deped Region 1, a ti 2026 R1AA Meet ket saan laeng a maysa nga sporting competition, ngem ketdi agserbi daytoy a plataporma a mangsukog iti disiplina, panagga-gayyem, ken panagbalin a nasayaat dagiti agtutubo a Pilipino.
