Pummigsa pay ti deportation case kontra ti naikkat a Mayor ti Bamban, Tarlac a ni Alice Guo kasaruno ti sentensya ti Manila Regional Trial Court (RTC) nga ideklara isuna kas pudno nga Chinese national ken saan a Pilipino.

Kinuna ni Bureau of Immigration (BI) Commissioner Joel Anthony Viado a nabayag dan a rinugian ti deportation proceedings kontra kenni Guo ken ibilbilang da daitoy kas dakkel a balligi para iti national security.

Imbutaktak pay ti kaso nu kastno a makaskastrek ti maysa a gangganaet iti posisyon ti gobierno, usar dagiti peke a dokumento ken parparbo a pakabigbigan.

Innayon na a daitoy a desisyon ti korte a mangtagiawan-bileg ti kina-Mayor ni Guo ken opisyal a panangideklara kenkuana a saanen a mabalin ti aniaman a pampubliko nga opisina ket mangpatpatibker kadagiti findings ti immigration records ken biometrics nga isuna ti Chinese national a ni Guo Hua Ping.

Pinapigsa pay daitoy iti legal a pinagbasaran da ken sinuportaran ti agtultuloy a tarigagay ti gobierno a salakniban dagiti beddeng ken institusyon ti Pilipinas.

Agarop sangapulo a bulan a nakabalud ni Guo gapo kadagiti nagtutuon a kaso, pakairamanan ti qualified human trafficking, money laundering, ken graft, nga amin ket adda pakainaigan na ti transnational criminal network operating scam hubs sadiay Bamban, Tarlac.

Kabayatanna, nagtignay met ti BI chief a suportaran na ti agtultuloy nga imbestigasyon tapno mapagsungbat ni Guo iti sibubukel a bileg ti linteg.