Inwaragawag ti Department of Foreign Affairs (DFA) nga awan iti nailista da a Pilipino a natay wenno nasaktan iti wildfires a timpuar idiay Lahaina idiay isla ti Maui, Hawaii idi napan a lawas.
Imbaga ni DFA Undersecretary Eduardo de Vega a laksid iti report ti Maui Filipino Chamber of Commerce a gasut a Pilipino iti kabilang kadagiti nasurok 1,000 a mapukpukaw iti napasamak a wildfire, awan pay ti impormasyon da nu adda kadagitoy iti Filipino citizens.
Imbaga kenkuana ni Consul General Emilio Fernandez a kaadwan kadagiti Pilipino idiay Maui ket American citizens.
Segun kenni de Vega, adda iti 25,000 Filipino-Americans idiay Maui, a kaadwan ket agtrab-trabaho kadagiti tourist hotel-resort .
Kaadwan kadagitoy a Fil-Am ket naturalized Americans, ken ibagbagi da ti 17 percent iti pakabuklan a populasyon ti isla ti Maui idiay Hawaii.
Kabayatanna, iti Maui Filipino Chamber of Commerce ket maysa a Bayanihan Group dagiti negosyante, a nakasagana a tumulong kadagiti agpatulong a Pilipino idiay Maui, segun kenni Bombo International News Correspondent Paul John Castillo.
