Nagpakdaar ni Department of the Interior and Local Government (DILG) Secretary Jonvic Remulla a masesante ‘on the spot’ ti amin nga fire personnel nga mairaman ti aniaman klase ti panagkusit.
Karaman kadaitoy ti panangilako kadagiti fire extinguishers kadagiti negosyante tapno maka-secure laeng iti fire safety clearances kadagiti negosyo da.
Daitoy ti impaganetget ti DILG chief kasaruno ti panangipalpalagip nga iti sidong ti BFP Memorandum Circular (MC) 2016-016, strikto a maipawil kadagiti BFP personnel ti agilako kadagiti fire extinguishers ken panag-endorso kadagitoy kadagiti manufacturers, dealers, ken suppliers dagiti arawaten a mangsebseb iti apoy.
Babaen ti Ease of Doing Business Law, nasken nga ag-isyu ti BFP ti Fire Safety Evaluation Clearance ken Fire Safety Inspection Certificate kadagiti negosyo ti las-ud ti maysa lawas.
