BR LA UNION – Duk-duktalen ti Department of the Interior and Local Government (DILG) dagiti mayor ken dadduma pay a lokal nga opisyal idiay Cebu a nagbiyahe a nagturong idiay Europa bayat a madup-duprak iti probinsiya da ti Bagyo Tino a nanggubway ti nakaru a perdisyon ken nakatayan ti nasurok 100 a tattao.
Segun kenni Assistant Provincial Administrator Aldwen Empaces, binilin ti DILG Central Office iti kapitolyo ti Cebu nga agsumite iti travel order ken maiyannatop a dokumento tapno maamwan nu adda legal a basaran ti biyahe dagiti nasao nga opisyal.
Kabilang dagiti impaayan ni Gov. Pamela Baricuatro ti Foreign Travel Authority (FTA) ket dagiti pito a mayor manipud naduma-duma nga ili idiay Cebu, agraman ni Provincial Board Member Andrei Duterte.
Inlawlawag ni Baricuatro, a ti travel authority ket napirmaan sakbay pay a timmama ti bagyo ken dadduma pay a kalamidad iti rehiyon.
Kabayatanna, ni Tourism Secretary Christina Garcia Frasco ket adda idiay London idi Nobyembre 4 kas lider ti delegasyon ti Pilipinas iti World Travel Market.
Idi madamag na ti kalamidad, dagus a nagawid iti pagilian kadwa na ti asawa na, ni 5th District Representative Duke Frasco, tapno idaulwan ti relief operations idiay Cebu.
