BR LA UNION – Impangato iti heightened alert ti Department of the Interior and Local Government (DILG) kadagiti Local Government Unit (LGU), partikular iti Amianan a Luzon ken dadduma pay a hazard-prone areas, gaputi manamnama a panagserrek ti Super Typhoon Bavi iti Philippine Area of Responsibility (PAR).
Iti inruar nga abiso ti DILG ita nga aldaw ti Martes, nabilin dagiti lokal a gobyerno nga isagana iti disaster response mechanisms ken siguradwen a nakasagana iti komunidad a nangato ti peligro nu kumaru iti sitwasyon.
Segun iti DILG, kasayaatan nga agsagana itan ken aggaraw a nasa-sapa tapno maprotektaran dagiti residente.
Immunan a naipangato ti heightened alert iti National Disaster Risk Reduction and Management Council (NDRRMC) kas panagsagana iti namnamaen nga epekto ti bagyo.
Kabayatanna, imbaga ti Department of Social Welfare and Development a nakasagana metten ti ahensya a mangipaay ti ayuda ken dadduma pay a kasapolan a tulong kadagiti indibidwal ken pamilya a posible a maapektaran.
Nu naan-anay a sumrek iti PAR ti Super Typhoon Bavi, maawagan daytoy ti bagyo “Inday.”
Maibasar iti kaudian a report ti PAGASA, namnamaen a sumrek ti bagyo iti Philippine Area of Responsibility ita a rabii ti Martes wenno parbangon ti Miyerkules.
