Posible a “Bagman” wenno “Legman” dagiti dadakkel a kontratista dagiti District Engineers ti Department of Public Works and Highways (DPWH).
Impaganetget ni Senador Panfilo “Ping” Lacson daitoy a posibilidad kalpasan ti gandat a panag-suhol kenni Batangas 1st District Representative Leandro Leviste nga agtalna mainaig iti maanomalya nga infrastructure project iti masakopan na.
Impaganetget ti senador a saan a normal a mismo nga district engineer ti mangidiaya ti suhol a masansan ket manipud kadagiti kontratista isu a kasapulan ti nauneg nga imbestigasyon tapno maammoan nu sino ti adda iti likudan ti panagsuhol kenni Leviste.
Imbatad pay ni Lacson a kasapulan ti “surgical solution” iti sistematiko a korapsyon ti Department of Public Works and Highways, a nasursurok pay ngem iti simple a panagsukat wenno panagre-assign kadagiti opisyales ti ahensya.
Tarigagay ti senador ti nauneg nga imbestigasyon ti nagbinnulig a kameng ti Philippine National Police Criminal Investigation and Detection Group, ken National Bureau of Investigation ken saan laeng a maisardeng ti panangipila ti kaso kenni Batangas 1st District Engineer Abelardo Calalo.
Mainaig iti daitoy, nakaragsakan met ni Lacson ti inaramid ni Leviste a saan nga inawat ti suhol kasta met binagaanen ti senador ti ina ti kongresista a ni Senadora Loren Legarda nga ipasigurado ti seguridad ti anak na gapo iti binilyon a gatad ti pondo a mapagsasaritaan.
Mangnamnama daitoy a maaddaan iti gundaway a personal a kablaawan ni Leviste ken pagyamanan iti panagtignay na kontra ti kultura iti kickback a manglaslason kadagiti agtutubo nga agserserbi iti Kongreso.
