Nangisayangkat ti aktibidad kontra dengue dagiti district hospital ditoy La Union kas panagrambak iti Dengue Awareness Month idi Hunyo 2026.
Naangay idiay Balaoan District Hospital ti health talk maipapan kadagiti sintomas ti dengue idi Hunyo 10. Intultuloy met ti Caba District Hospital ti W.I.L.D. campaign a nakapamaysa iti Waterborne Diseases, Influenza-like Illness, Leptospirosis, ken Dengue.
Pinapigsa ti Rosario District Hospital iti “Clean and Green” ken “Taktak Taob” programs idi Hunyo 2 ken 4, bayat a nangisayangkat iti Bacnotan District Hospital ti “Sabayang Linis” ken lecture idi Hunyo 19. Nakapamaysa met ti La Union Medical Center ti “Alas Kwatro, Kontra Mosquito” idi Hunyo 18, kagiddan ti linawas a “Dalus Drive” babaen ti wagas a “Taob, Taktak, Tuyo, at Takip.”
Kabayatanna, pinalawa ti Naguilian District Hospital iti health education ken panangipaay ti bitamina iti Dagup Integrated School idiay Bagulin idi Hunyo 24 kas paset ti dengue prevention campaign.
Panggep dagiti aktibidad a papigsaen iti pannakaammo ti publiko ken itandudo iti nasapa a panangliklik iti dengue babaen ti edukasion ken panangpatalinaed ti kinadalus iti komunidad.###
