Pormalen a nilukatan ti Department of Migrant Workers (DMW) ti baro a Children Learning Center da idiay Jeddah, Saudi Arabia.
Indauloan ni DMW Secretary Hans Leo Cacdac ti panaglukat ti nasao a learning center para kadagiti ubbing nga adda iti kustodiya ken al-alagaan dagiti Migrant Workers iti Bahay Kalinga.
Panggep daitoy a panangipasdek ti center a saan a maibati dagiti ubbing, nangruna maipapan kadagiti pagrebbengan da, karbengan, edukasyon, ken dadduma pay a pagsyaatan.
Ti inisyatiba ket maysa a proyekto babaen ti Philippine Consulate General, Migrant Workers Office, ken dadduma pay a Filipino Community Groups kasta met dagiti Overseas Filipino Workers Advocates ti nasao a pagilian.
Kabayatanna, sumagmamano met kadagiti ubbing nga adda sadiay Bahay Kalinga ket marigatanen a makaawid agsipud ta dagiti nagannak da ket addaan kadagiti sangsangwen a travel bans.
Iti agdama ket nasurok 30 dagiti ubbing a pagsererbian iti center ken impasiguro met ni Cacdac a papintasen ken palawaen da pay ti pasdek kadagiti sumaganad a bulan.
