Kinondenar ni Department of National Defense Secretary Gilberto Teodoro Jr. iti China Daily kalpasan a mangiruar iti Chinese state media outlet iti social media post a mangiladladawan kadagiti Pilipino kas “bakes,” mainaig paylaeng iti saritaan ti arbitral ruling idiay West Philippine Sea (WPS).
Segun kenni Teodoro, ipakpakita laeng ti nasao a post iti perspektibo iti Chinese Communist Party (CCP) kontra kadagiti Pilipino.
Nairuar daitoy idi Hulyo 10, dua nga aldaw laeng sakbay iti maika-10 nga anibersaryo iti historiko a desisyon ti Permanent Court of Arbitration a nangbigbig iti karbengan ti Pilipinas para ti Exclusive Economic Zone (EEZ) na idiay WPS.
Kinuna iti opisyal a ti panangiladawan kas “bakes” kadagiti Pilipino ket panangtagibassit ken propaganda maibusor iti Pilipinas.
Iti video ket makita iti maysa a “bakes” a nakakawes iti Barong Tagalog ken salakot, nga arig na ibabaon dagiti karakter a mangibagbagi kadagiti Amerikano ken Hapones.
Naipabuya pay iti panang-water cannon ti China iti “bakes” kalpasan a makaawat iti kopya ti arbitral award.
Inawagan ni Teodoro iti material a “contemptible propaganda” ken pananguyaw iti 2016 Arbitral Award, nga innayon na ket mangipakpakita metlaeng iti kinaranggas kadagiti Pilipino ken soldado.
Imbatad na a saan a kabaelan iti China a depensaan dagiti panag-agom na idiay WPS babaen iti nainkalintegan nga argumento isu nga aguy-uyaw da laengen.
Kinondenar metlaeng ni Rear Admiral Jay Tarriela, pannakangiwat iti Philippine Coast Guard for the West Philippine Sea concerns, ti aniaman a klase ti ‘racism’ mainaig iti nasao a post.
