Inlawlawag ti Department of Energy (DOE) a saan a dagos a makaipasdek ti pagilian kadagiti nuclear power plant gapo iti panagbalin a linteg ti Philippine National Nuclear Energy Safety Act.
Segun kenni Energy Undersecretary Sharon Garin, panggep da a maipasdek dagiti nasao a planta inton tawen 2032, ngem kasapulan a maiyannurot latta daitoy kadagiti standards ti International Atomic Energy Agency (IAEA).
Maipalagip a naipasa ti Philippine National Nuclear Energy Safety Act kalpasan a ratipikaran ti Senado ken Kamara ken naidatag ti Philippine Atomic Energy Regulatory Authority wenno PhilATOM nga isu ket agserbi nga ahensya a mangadal ken responsable ti regulasyon dagiti amin nga operasyon ti nuclear energy ditoy Pilipinas; pakairamanan ditan ti kinatalged, konstruksiyon, ken ti inaldaw-aldaw a kasasaad dagiti pasilidad.
Mangnamnama met ti DOE a mangipaay dalan ti pannakabukel ti PhilATOM, saan laeng a para ti enerhiya nu di ket agraman pay dagiti agnumar iti teknolohiya iti tay-ak ti salun-at, agrikultura, ken kadagiti scientific researches.
