Naka-high alert ita ti Department of Energy (DOE) tapno masiguro nga agtultuloy ti supply ti kuryente para iti 2025 national and local elections.
Segun iti ahensya, mangrugin ti operasyon ti Energy Task Force Election 24/7 mangrugi ita nga aldaw, Mayo 11, tapno maliklikan ti aniaman a pannakatantan ti supply ti kuryente, sakbay, kabayatan, ken kalpasan ti panagbotos.
Panggep ti task force a mapagtalinaed ti integridad ti electoral process babaen ti maagap ng addang ken napartak a panagsungbat ti aniaman a posible nga power disruptions.
Karaman iti task force kadagiti ahensya nga adda koneksyon na ti enerhiya, power generation, distribution companies, ken sabali pay a maiyannatop nga institusyon.
Kinuna pay ti DOE nga activated itan ti contingency protocols, nalpasen iti nationwide readiness assessments, ken addan ti umdas a power reserves.
Silulukat metten dagiti command centers ti intero nga energy sector, karamanen ti National Grid Corporation of the Philippines (NGCP), National Electrification Administration (NEA), Manila Electric Company (Meralco), ken ti Energy Sector Emergency Operations Center ti departamento.
Agtalinaed a nakalukat daitoy agingga Mayo 13 ken adda kabaelan na nga ag-monitor kasta met a mangsungbat ti aniaman a problema ti grid.
Pinaregta pay ti DOE iti publiko a dagos nga ireport ti aniaman nga insidente wenno aberya iti kuryente tapno mapapartak ti panagsungbat ken maliklikan ti napaot a pannapukaw ti supply.
