Mangnamnama ni Finance Secretary Ralph Recto nga iti 0.9% inflation rate idi Hulyo – iti kababaan iti uneg ti innem a tawen – ket makaipaay ti dakkel a gin-awa kadagiti nakurapay a pamilya partikular iti agtultuloy a panagbaba ti presyo ti taraon, kangrunaan ti bagas.
Iti average inflation manipud Enero agingana Hulyo ket 1.7%, nabab-baba maiyarig iti target ti gobierno a 2.0% agingana 4.0% a mangpasingked ti kinatibker ti presyo dagiti magagatang.
Segun kenni Recto, napateg a marikna ti tunggal Pilipino iti panagbaba ti presyo ti bagas, makan, kuryente, ken dadduma pay a pagkasapulan.
Palawag pay ti sekretaryo, dakkel iti nagbalin nga akem ni Presidente Ferdinand R. Marcos Jr. babaen ti programa na kas iti “Benteng Bigas” ken Kadiwa ng Pangulo, pakairamanan iti panangipatungpal ti nababa a taripa.
Iti laksid daytoy ket agtaltalinaed nga alerto kadagiti posible a pangta iti presyo kas iti kalamidad ken sangalubongan a tensyon.#
