Pinasingkedan ti Department of Health nga adda ti apagapaman a panagngato ti kaso ti measles-rubella ditoy pagilian para ti umuna a lawas ti bulan ti Mayo.
Maibasar ti datos nga inruar ti ahensya, dumanon ti pakabuklan a 2,118 casese ti nailista agingga Mayo 10 ti agdama a tawen.
TI nasao a bilang ket nangatngato ngem iti kaso a nailista ti kapada a panawen idi napalabas a tawen a dumanon ti agingga 2,068 a kaso.
Mainaig iti dayta ket agtaltalinaed latta iti National Capital Region nga addaan ti kaaduan a nailista para ti nasao a sakit. SInaruno daitoy ti CALABARZON, MIMAROPA, Central Luzon, ken ti Zamboanga Peninsula.
Kabayatanna, nakaragsakan met ti Department of Health ti panagbaba ti fatality rate nga agingga 0.42% laeng a nababbaba ti 0.46 fatality rate idi tawen 2024.
Segun kenni Health Secretary Ted Herbosa, agtultuloy latta ti isaysayangkat da a panagbakuna tapno makontrol ti panagngato ti kaso ti measles-rubella.
Maibasar met ti datos manipud DOH, dumanon laeng ti agingga 65% kadagiti ubbing ti nabakunaan idi napalabas a tawen ken target a malampasan daitoy ita a tawen 2025.
Partikular met a panggep a bakunaan ti ahensya dagiti ubbing nga awan pay ti maysa iti tawen da.
