BR LA UNION – Impaganetget ti Department of Justice a iti impormasyon nga adda iti kustodiya ti pagilian a Czech Republic ni sigud nga Ako Bicol Party-list Rep. Zaldy Co.
Iti presscon ti DOJ ita nga aldaw, pinunas ni Justice Secretary Fredderick A. Vida dagiti panagdudua ken pinaglibakanna iti waragawag a mangibagbaga a saan a pudno a naarestar ti sigud a mammanday linteg.
Daytoy ket kasaruno iti anunsyo ni President Ferdinand ‘Bongbong’ Marcos Jr. nga iggem dagiti otoridad idiay Czech Republic ti akusado a ni Zaldy Co.
Kinumpirma pay ti sekretaryo a rinugyanen ti gobyerno nga iproseso ti pannakaisubli ditoy Pilipinas ti sigud a mammanday linteg a sumangsango iti nagduduma a kaso.
Imbida met ni Justice Secretary Vida a kumpiyansa ti ahensiya nga adda iti umno a direksyon ti gobyerno iti panangi-proseso iti kaso ken iti sitwasyon ni former Cong. Zaldy Co.
Ad-adalenen kunana dagiti legal nga opsyon nga aramiden ti gobyerno tapno maipatungpal iti tarigagay a maisubli ditoy Pilipinas ti sigud a mammanday linteg.
Kasapolan a maisango ni Co iti korte ti Sandiganbayan, a nakaidatagan ti kaso a malversation of public funds through falsifiication, graft, ken dadduma pay nga adda pakainaiganna iti anomalya dagiti flood control projects.
