Mangidadaulo ni Department of Science and Technology (DOST) Secretary Renato Solidum Jr. kadagiti miemro ti gabinete ni Presidente Ferdinand Marcos Junior nga addaan ti kangatuan a sueldo idi napalabas a tawen. Daitoy ket kas maibasar ti 2024 report on Salaries and Allowances ti Commission on Audit.
Agparparang a nakaawat ti sekretary ti pakabuklan a P6.38-M a sahod idi napalabas a tawen. Ngimmato daitoy ti P319,000 manipud ti sueldo na idi tawen 2023 a dumanon ti P6.06-M.
Manipud iti inruar a breakdown ti COA mainaig ti net pay ni Secretary Solidum, karaman ditoy ti basic salary na kas sekretaryo ti DOST, allowances, bonuses, incentives ken benefits; discretionary, extraordinary ken miscellaneous expenses; kanayunan a compensation ken honorarium kasta met dagiti adjustments manipud kadagiti naglabas a tawen.
Natakuatan iti audit nga awan ti naawat ni Solidum a compensation kas board member ti Technical Education and Skills Development Authority (TESDA), Philippine Coconut Authority, ken ti National Dairy Authority.
Kabayatanna, nakaawat met ni Solidum iti allowance a P13,500 kas miembro ti Board of Regents ti Batangas State University.
Maikadua met nga addaan ti kangatuan a sueldo a miembro ti gabinete ken ni CHED Chairman Prospero de Vera III nga addaan ti pakabuklan biruk a P5.37-M idi tawen 2024 manipud ti P5.19-M idi tawen 2023.
Maikatlo met iti puesto ni Department of Justice (DOJ) Secretary Jesus Crispin Remulla a sigud a numero uno idi tawen 2023. Idi napalabas a tawen ket nakaawat ti sekretary ti net pay a dumanon ti P5.28-M manipud ti P7.08-M.
Maikauppat ni Social Welfare Secretary Rex Gatchalian nga addaan ti net pay a dumanon ti P5.19-M, pang-lima ni Labor Secretary Bienvenido Laguesma para ti P5.19-M.
Maika-innem ni Health Secretary Teodoro Herbosa a nakaawat ti P5.11-M net pay, pang-pito ni Information and Communications Technology Secretary Ivan Uy (P5.03 million); pang-walo ni Agrarian Reform Secretary Conrado Estrella III (P4.99 million); pang-siyam ni Agriculture Secretary Francisco Tiu Laurel (P4.96 million) ken pang sangapulo ni Public Works Secretary Manuel Bonoan (P4.95 million).
