BR LA UNION – Napaway-wayan agingga Biyernes iti Department of Public Works and Highways (DPWH) tapno ileppas iti beripikasyon dagiti “red flag” a proyekto a posible nga adda duplikasyon na, wenno dagiti 2025 projects ket nairaman manen iti gakat a 2026 national budget.
Iti agtultuloy a panangsukimat iti gakat a pondo ti DPWH para iti 2026, imbaga ni Public Works Secretary Vince Dizon a manipud iti pakabuklan a 946 repetitive projects nga agbalor ti P14.455 bilyon, ket 798 proyekto iti na-validate ken agbalor dagitoy ti P11.656 bilyon.
Nupay kasta, aminado ni Dizon a saan pay a nalpas iti beripikasyon agsipudta kurang ti oras a nailatang kadakuada.
Maysa a lawas laeng ti impaay ti Senado, ken saan nga iti agdama a liderato ti DPWH ti nangisagana ti nasao a budget.
Inlawlawag pay ni Dizon, a kadagiti 798 proyekto a na-validate, awan ti nakita da a duplikasyon wenno naulit a proyekto.
Ngem iti nabatbati nga 148 projects, agtultuloy iti panangamiris da tapno madetermina nu adda dagiti posible a naulit wenno maaw-awagan a “ghost projects.”
Inbutaktak met ni Senate Committee on Finance Chairman Senador Sherwin Gatchalian a sumagmamano a lokal nga opisyal ti immasideg kenkuana, tapno ipeksa ti panagdanag da kadagiti maipagarop a duplicated projects iti masakopan da a lugar.
Dagiti met dadduma ket inlawlawag da a dagitoy ket “continuation projects” wenno panangituloy dagiti sigud a narugyanen a proyekto.
