Inlawlawag ni Department of Public Works and Highways (DPWH) Secretary Manuel Bonoan ti kangrunaan a panggep ti nababalaw a rock shed project idiay Tuba, Benguet.
Idi laeng kallabes ket personal a binisita daitoy ni Presidente Ferdinand Marcos ken inawagan na a “useless” wenno awan ti serserbi gapo ta saan a pulos a nausar ken nakarkaro laeng a nangigubuay ti perdisyon iti lokal nga ekonomiya, malaksid a nagbalin pay a pangta kadagiti sanikua ken biag dagiti residente.
Ti pader a nakakonektar iti istraktura ket nakumpromiso gapo iti panagreggay ti daga a nakaipasdekan na isu a dakkel a pangta paylaeng daitoy kadagiti dumalyasat a motorista.
Napondoan ti rock shed ti aganay P264-M a nadisenyo tapno masalakniban dagiti motorista manipud kadagiti agtennag a batbato.
Depensa met ni Secretary Bonoan, ti rock shed ket napateg nga engineering intervention tapno maprotektaran dagiti aglabas a motorista iti lugar agsipud ta pagaammo iti lokasyon a ‘geologically unstable area’ a masansan ket agtentennag dagiti dadakkel a tipak ti bato manipud iti bantay kasaruno iti pangta ti panagreggaay iti daga.
Kinaagpaysuananna kunana ket sumagmamano payen a rock sheds ti naipasdek iti kawatiwatan ti Marcos Highway idiay Tuba, Benguet ken idiay probinsya ti Cagayan. Dagitoy ket nagbalin nga epektibo a proteksyon para kadagiti motorista ken residente.
Sakbay na ket nagtennag dagiti bato a nakaipasdekan ti kontrobersyal a proyekto idi bulan ti Hulyo gapo iti serye dagiti panagreggaay ti daga nga inggubuay ti agtultuloy a panagtudo.
Insungbat ni Bonoan a binilin nan ti regional office ti DPWH a mangisubmitir ti report para ti madagdagos a pannakapapirmis ti nadadael a paset ti rock shed.
