Kagiddan ti pannakarambak ti maika-60 nga anibersario ti Bombo Radyo Philippines, daydayawen ti sibubukel a network ni Dr. Rogelio M. Florete, Chairman ti Florete Group of Companies, a nangituloy ken nangpadur-as iti mision nga inrugi ti amana a ni Don Marcelino Florete.
Iti panangidaulo ni Dr. Florete, nagbalin ti Bombo Radyo Philippines a maysa kadagiti kapigsaan ken mapagtalkan a broadcasting institutions iti pagilian. Pinalawana iti panagpataray ti network, nangitandudo iti modernisasion dagiti estasion, ken nangipasdek iti kultura ti propesionalismo, integridad, ken serbisio publiko.
Ti pammatina a “Truth is non-negotiable and excellence is the benchmark” ket nagserbi a kas giya para kadagiti rinibu a periodista, brodkaster, ken empleado ti Bombo Radyo kadagiti inaldaw a panagtrabaho. Iti sidong daytoy a prinsipio, agtultuloy nga itandudo ti network iti natimbeng a komentaryo, patas a panagipadamag, ken responsable a panagwaragawag.
Iti panangidaulona, saan laeng a napalawa ti sakop ti Bombo Radyo iti intero a pagilian, no di ket napatibker iti panagtalek ti publiko iti network kas kangrunaan a pagtaudan ti damag ken impormasion.
Gapu iti naisangsangayan a kontribusion iti industria ti media ken negosio, nabigbig ni Dr. Florete kas Lifetime Achievement Awardee ti Kapisanan ng mga Brodkaster ng Pilipinas (KBP), Captain of Industry in Media ti Philippine Chamber of Commerce and Industry–Western Visayas, ken nakaawat iti nadumaduma pay a prestihiyoso a pammigbig a pakairamanan ti Ninoy Aquino Award for Nationalism, Golden Salakot Award, Diamond Lifetime Achievement Award para iti Mass Media, Dungog sang Iloilo Award, ken Business Icon in the Visayas.
Iti agdama, iti pananglaglagip iti innem a pulo a tawen ti Bombo Radyo Philippines, bigbigen ti sibubukel a network ti maysa a lider a ti sirmata, kinatalged, ken dedikasion ti nangipasdek iti natibker a pundasion para iti balligi ti organisasion.
Agyaman kami unay, Dr. Rogelio M. Florete.
Babaen ti panangidaulom, nagbalinen ti Bombo Radyo a saan laeng a broadcasting network. Nagbalinen nga institusion a pagtaltalkan la unay ti umili a Pilipino—maysa a pagtaengan ti kinapudno, kinalaing, ken pudno a serbisio publiko.
