Sinuspindir ti Land Transportation Office (LTO) ti driver’s license ti 21-anyos nga internet personality ken negosyante a ni Josh Mojica kalpasan a naglabsing ti paglintegan ti trapiko.
Pinasingkedan ti LTO manipud ti opisyal a waragawag da a naala iti video ti aktwal a panagmaneho ni Mojica kabayatan iti panag-video na ti bagbagi na usar ti cellphone — maysa a nalawag a panaglabsing ti Anti-Distracted Driving Act.
Segun kenni LTO Chief Assistant Secretary Vigor Mendoza II, saan a rason iti klase wenno nangina a lugan tapno tagiawanen ti linteg.
Kabayatanna, makita met iti inupload a video ni Mojica nga isuna ket agmananeho ti luxury car a bayat a nakaiggem ti cellphone; Kinabilan na daitoy ti caption a ”Life’s so fckn good when u stay masipag & pogi.”
Nakagun-od met kadagiti pammabalaw manipud kadagiti netizens ni Mojico nga inawag ti galad na kas iresponsable. Adu iti nagkuna a kas masya a public figure ket rumbeng nga agbalin isuna a nasayaat a pagtuladan kadagiti makabuybuya kenkuana.
Maibasar ti Show Cause Order (SCO) nga in-issue ti LTO-Intelligence and Investigation Division babaen ti panangidaulo ni Chief Renante Melitante, sumangsango ni Mojica iti Reckless Driving, panaglabsing ti Anti-Distracted Driving Act (Sec. 4 ti R.A. No. 10913, ken Being an Improper Person to Operate a Motor Vehicle (Sec. 27(a) ti R.A. No. 4136).
Ti maudi a kaso ket mabalin nga agresulta ti pannakakanselar ti lisensiya na. Malaksid iti suspensiyon, nabilin pay ni Mojica a sumango iti LTO tapno ilawlawag nu apay a saan a rumbeng isuna a madusa kadagiti administrative penalties.
Iti agdama ket naipasidong met ti alarm list ti LTO ti minaneho na a Porsche kabayatan nga agtultuloy ti imbestigasyon.
Ni Josh Mojica ket immuna a nagbalin a nalatak idi tawen 2021 kalpasan ti viral a kuwento na mainaig ti panaglako ti homemade kangkong chips. manipud idin ket nagbalin isunan nga ubing a negosyante ken influencer.
Impaganetget manen ti LTO a ti panagbalin a nalatak ken nabaknang ket saan a rason tapno matakasan ti paglintegan.
