BR LA UNION – Inarestar ti nagtipon a puwersa dagiti otoridad, iti panangidaulo ti City of San Fernando Police Station iti maysa a maipagarop a drug pusher kabayatan ti buy-bust operation idiay Brgy. Carlatan, San Fernando City, La Union.
Maibasar iti police report, ti suspek ket managan Edward Respes, 55-anyos, maibilang nga street level individual, tubo ti Brgy. Calanutian, Sinait, Ilocos Sur.
Nakumpiskar dagiti otoridad manipud iti suspek ti maysa a heat-sealed transparent plastic sachet ti maipagarop a shabu, mapatta-patta nga agdagsen ti 0.4 gram ken agbalor ti PhP 1,700.
Karaman pay a nakumpiskar ti maysa nga improvised glass tube toother nga addaan ti residue ti maipagarop a shabu ken dagiti non-drug evidence a kas iti maysa a genuine one thousand peso bill a nagbalin a marked money, maysa a cellular phone, maysa a lighter ken nangisit a motorsiklo ti suspek.
Ti suspek ket naipasidong iti custodiya ti San Fernando City Police Station ken maisag-sagana ti kaso a maidatag kontra kenkuana.
