Impaganetget ni Department of Social Welfare and Development (DSWD) Secretary Rex Gatchalian a ti Ayuda para sa Kapos ang Kita Program wenno AKAP ket saan a pork barrel ken saan a responsibilidad dagiti opisial ti barangay ti mangikeddeng iti listaan dagiti benepisiario ti programa.
Iti maysa a statement, impaganetget ti sekretario nga amin a field offices ti DSWD iti intero a pagilian ket agserserbi kadagiti tattao nga agkasapulan, walk-in clients man wenno referred by local government officials.
Inlawlawag pay ni Secretary Gatchalian a dagiti social workers-da ti mangproseso kadagiti aplikasion para iti AKAP ken mangikeddeng iti gatad ti tulong a maited kadagiti kualipikado a benepisiario.
Daytoy a pananglawlawag ti sekretario ket kalpasan ti immun-una a palawag ni retired Supreme Court Senior Associate Justice Antonio Carpio a mangipadpada iti AKAP cash assistance iti kontrobersial a pork barrel system ken inrekomendana nga isubmitir dagiti opisyales ti barangay ti listaan dagiti benepisiario.
Kinuna met ni Secretary Gatchalian nga awan ti probision iti pagannurotan ti AKAP a mangipalubos kadagiti opisial a mangilasin kadagiti benepisiario ti programa.
Segun iti sekretario, ti orihinal a panggep ti AKAP ket tapno masalakniban dagiti minimum wage earners ken near-poor status a Pilipino manipud iti epekto ti implasion.
