Inlawlawag ti Department of Social Welfare and Development (DSWD) a sabali pay ti 5K fuel subsidy manipud Land Transportation Franchising and Regulatory Board (LTFRB) iti tulong pinansiyal a naggapo met kadakuada.
Segun kenni DSWD Secretary Rex Gatchalian, ti laeng listaan dagiti tricycle drivers ti kidkiddawen ti DSWD manipud kadagiti lokal a gobierno bayat a para kadagiti tsuper met ti jeep ti maala a listaan ti benepisyaryo manipud record ti LTFRB. Awan met iti imbatad a kanayunan a requirements iti Sekretaryo.
Ti panangilawlawag ket kagiddan ti panawagan ni Manibela chairperson Mar Valbuena nga adu a tsuper iti marigrigatan a makwalipika iti programa ti DSWD nga Assistance to Individual in Crisis Situation (AICS) gapo kadagiti narikut a requirements nga intuding ti lokal a gobierno.
Impadanon pay ni Valbuena ti panangaramat ti outdated a listaan nga idi pay panawen ti COVID-19 pandemic para kadagiti benepisyaryo para ti cash assistance program.
