Nagpalagip manen ti Department of Social Welfare and Development (DSWD) iti publiko seknan ti Assistance to Individuals in Crisis Situation o AICS program.
Impaganetget ti ahensya a saanen a kasapulan a mangusar pay kadagiti fixers ken panggep ti gobierno a masalakniban iti publiko manipud kadagiti managgundaway kasta met a siguraduenda a maipadanon ti tulong kadagiti pudno nga agkasapulan.
Segun kenni DSWD Crisis Intervention Program Director Edwin Morata, dagiti social workers ti ahensya ket kanayon a nakasagana nga umalalay ken tumulong ti siasinoman nga indibidwal nga umasideg kadakuada nga agkasapulan ti suporta.
Dagiti personnel da ket nasanay tapno madagdagos a mangipadanon ti tulong kadagiti tattao nga naisagmak ti krisis. Impasigurado pay ti DSWD a ti proseso ti panagapply para ti AICS ket nalaka ken saan a nagastos.
Kasapulan laeng ti aplikante dagiti umiso nga impormasyon ken siguraduen nga usto metlaeng dagiti tattao nga asitgan da para ti tulong.
Impaganetget pay ni Director Morata a ti panangaramat kadagiti fixers ket saan a makatulong ti aniaman a waga nu ketdi ket mabalin pay a mangigubuay ti kanayonan a problema, pannakatikaw, ken posible a dakdakkel a magastar.
Gapo iti dayta ket imparegta ti ahensya a direkta a makikoordinar kadakuada tapno maliklikan ti aniaman komplikasyon.
