Nakatuding nga agturong idiay Estados Unidos ni Department of Trade and Industry (DTI) Secretary Cristina Roque inton sumaruno a lawas.
Kasaruno daitoy ti nakaruding a pannakitaripnong dagiti trade and economic officials ti Pilipinas iti Trump administration tapno sungbatan ti impaulog da a taripa ditoy pagilian.
Segun iti sekretaya, agbiahe isuna nga agturong sadiay US inton aldaw ti Martes, Abril 29 kadwa ni Special Assistant to the President for Investment and Economic Affairs Secretary Frederick Go.
Kabayatanna, saan na metten dinakamat ti eksakto a petsa ti nakatuding da a pannakiuman kadagiti opisyales ti Estados Unidos nupay sigurado a maangay daitoy sakbay ti panagawid da inton Mayo 2.
Makisarak ti delegasyon ti Pilipinas kadagiti trade gurus ti Trump administration kas ni US Trade Representative (USTR) Ambassador Jamieson Greer and Commerce Secretary Howard Lutnick.
Segun pay kenni Secretary Roque, kangrunaan a panggep ti panagtataripnong ket ti natibker nga alyansa ti nagbaetan dagiti dua a pagilian,malaksid pay ti naipaulog a taripa.
Maipalagip a indatagan ni US President Donald Trump dagiti amin nga foreign-based goods ti 10% a taripa nga ken ti kanayunan a reciprocal tariffs kadagiti pagilian nga addaan trade deficit iti pagilian da.
Iti biang ti Pilipinas, aganay 17% ti taripa a naipaulog – nababbaba nga amang nu maidasig kadagiti kabangibang a pagilian kas iti Vietnam, Thailand, Indonesia ken Malaysia.
Nupay intantan ni Trump ti nasao nga reciprocal tariffs ti las-ud ti 90 nga aldaw ket nakatuding na met nga ituloy daitoy inton bulan ti Hulyo.
