Agdama a nakasanglad dagiti dua a Japanese destroyers sadiay Port Area, Manila para ti 3-day port visit da ditoy Pilipinas.
Mangipakpakita daitoy ti naun-uneg pay a koordinasyon dagiti naval forces ti Pilipinas ken Japan kasaruno ti ratipikasyon ti Reciprocal Access Agreement (RAA).
Simmangpet idiay Manila Port ti JS Ise (DDH-182), maysa a Hyuga-class helicopter destroyer, ken ti JS Suzunami (DD-114), maysa met a Takanami-class destroyer idi alas-10:30 ti bigat kas paset ti Indo-Pacific Deployment 2025 ti Japan Maritime Self-Defense Force.
Daitoy ket inisyatiba a nairanta para ti pannakapapigsa ti kooperasyon na kadagiti kaalyado a naval forces ti rehiyon babaen kadagiti joint training exercises. Sinarungkar met dagiti kameng ti Philippine Navy kakadwa iti Navy band dagiti Japanese navies.
Segun kenni Rear Admiral Natsui Takashi, commander ti Japenese Maritime Self-Defense Forces Escort Flotilla Fourm, simbolo daitoy a port call ti commitment ti Japan a mangsuporta iti Pilipinas ken dadduma pay a kapada a kapanunotan a nasyon para ti panagpatalinaed iti nawaya ken silulukat nga Indo-Pacific region.
Inlawlawag met ni Admiral Takashi a ti deployment dagiti dua a Japanese destroyers ket awan iti aniaman a punterya a partikular nga estado ken namnamaen na a maitandudo daitoy ti bilateral defense cooperation kadagiti maseknan a pagilian.
Daitoyen ti maikatlo a panagbisita dagiti Japanese navies ditoy Pilipinas ita a tawen laeng bayat a maikadua met a panagbisita para iti JS Ise nga immun-unan a nag-port visit idiay Subic idi tawen 2017.
Kabayatanna, nakatuding met a mangisayangkat iti naval exercises ti Japanese forces kadwa iti Philippine Navy tapno papigsaen iti interoperability ken ipamatmat iti ad-adu pay a naval engagements kabinnulig dagiti counterparts da babaen iti Reciprocal Access Agreement.
Ti panagbisita met ti Japanese destroyers ditoy pagilian ket kasaruno ti kabaroan a panagharass ti China Coast Guard (CCG).
Nangisayangkat daitoy ti water cannon attack kontra ti barko ti Pilipinas idiay Panatag shoal wenno Bajo de Masinloc idi Hunyo 20 kabayatan iti panangiwaras da iti fuel subsidies kadagiti mangngalap a Pilipino iti nasao a kabaybayan.
Imbatad met ni Admiral Takashi a nakamonitor iti Hanay da kadagiti naval activities ti China iti mapagsusupiatan teritoryo, pakairamanan ti kabaybayan nga adda iti uneg ti exclusive economic zone ti Pilipinas.
