Inasikaso ti Bauang Municipal Police Station idi alas kwatro ti malem ti Enero 14, 2025 ti panag-surrender ni Jindie Ruiz Lapasanda, 35-anyos, single, maysa a welder, ken umili ti Barangay Pudoc, Bauang, La Union.
Iti isu metlaeng nga aldaw, oras 1:16PM ket inasikaso met ti Agoo Municipal Police Station ti panag-surrender ni Teresita Miranda Villanueva, 41-anyos, single, ken residente ti Barangay San Manuel Norte, Agoo, La Union.
Ni Jindie ket sigud a miembro ti Anakpawis Party list Barangay Pudoc Chapter bayat a ni Teresita ket sigud met a miembro ti ‘Timek ken Namnama Dagiti Babassit a Mangngalap ti La Union’ wenno TIMEK.
Segun kadagiti dua, napagdesisyonan dan nga agikkat iti grupo ken kayat dan ti agbiag ti normal nga awan ti aniaman a koneksyon ken pakainaigan ti CPP-NPA-NDF, kasta met dagiti kapada pay a komunista nga organisasyon.
Gapo iti daitoy ket nagpirma da ti oath of allegiance bayat ti kaadda dagiti opisyales ti bukod da a barangay kas witness.
Kabayatanna, insurrender met ni Jindie ti maysa nga improvised shotgun wenno Sumpak. Kinunana a nakita na laeng daitoy iti daan a cabinet ti apong na iti family house da kabayatan iti panagdalus na.
