BR LA UNION – Lumaban manen iti One Championship iti dua a Filipino MMA fighter nga isuda Jean Claude Saclag ti Team Lakay ken Marwin Quirante ti AJJ Sprawl.
Makasango ni Saclag ni Turkmenistani MMA fighter Shazada Ataev iti sidong ti flyweight division idinto a lumaban ni Quirante iti bagito a Russian fighter a ni Torepchi Dongak iti sidong ti strawweight division.
Ti laban dagiti dua ket agpada a buklen ti 3 rounds.
Maipalagip nga immuna a naituding ti laban dagiti dua a Pinoy idi March 28 ngem nakanselar gaputi napigsa a gingined idiay Myanmar ken Thailand a nakatayan ti ginasut a tattao.
Da Saclag ken Quirante ket dua kadagiti bagito nga MMA fighter ti pagilian a manamnama a makagun-od ti kanayunan a One Championship exposure gapu ti impresibo a performance iti napalabas a laban.
Iti naudi a laban dagiti dua, agpada a nangipamatmat dagitoy ti unique martial arts style ken naaramid da a dominaen ti bukod da a laban kontra kadagiti nalalaing nga MMA fighters iti sabali a pagilian.
Maisayangkat inton Mayo-23 ti laban dagiti dua a Pinoy fighter idiay Lumpinee Stadium idiay Bangkok, Thailand.
