BR LA UNION – Nangidatag ti impeachment complaint iti agassawa ken sigud a National Youth Commission chairperson Ronald Cardema ken sigud a Duterte Youth party-list Rep. Marie Cardema, kontra kenni President Ferdinand Marcos Jr.
Adda pakainaiganna ti reklamo dagitoy iti panangipalubos nga iyawat ni sigud a president Rodrigo Duterte iti International Criminal Court (ICC).
Iti makunkuna a 24 a pinanid a reklamo da Cardema, maipagarop a linabsing ni Pres. Marcos iti Konstitusyon ken panang-gulib iti talek ti publiko gaputi panangipalubos a maarestar ti sigud a presidente maibasar iti warrant ti International Criminal Court (ICC).
Impaganetget da a napukaw ni Duterte iti karbengan a maipasidong iti due process.
Impost pay ti agassawa iti kopya ti reklamo dagitoy iti Duterte Youth’s Facebook page ita nga aldaw ti Huwebes.
Nupay kasta, saan a verified ken saan a nalawag nu inawat daytoy iti opisina ni House Secretary General Reginald Velasco, agsipudta naka-beak ti kamara gaputi midterm election ken ag-resume inton Hunyo 2, 2025.
Iti agassawa a Cardema ket nalatak a kaalyado dagiti Duterte.
Maipalagip nga idi 2019, napaay ni Ronald a magun-od ti nominasyon ti Duterte party list gaputi overage, isutgapuna a ti asawa na a ni Marie ti nangsukat kenkuana.
