Natay dagiti dua a staffs ti Israeli Embassy iti napasamak nga shooting incident iti ruar ti Jewish museum idiay Washington, D.C. idi rabii ti Miyerkules, oras idiay Estados Unidos.
Segun kenni Metropolitan Police Department chief Pamela Smith, adda itan iti kustodiya da iti suspek ti krimen.
Maibasar iti preliminary investigation, rumuar kuman dagiti biktima manipud ti maysa nga event idiay Capitol Jewish Museum idi napasamak ti pammaltog. Mamati met dagiti otoridad nga awan ti kasabwat ti suspek agsipud ta sakbay a mapasamak iti insidente ket makita daitoyen nga agpalpaliiw iti aglawlaw ti museo.
Nabigbig iti suspek ti nagan nga Elias Rodriguez, 30-anyos manipud Chicago; inasikgan na dagiti grupo ti uppat a tattao ken kellaat a nagpaputok ti paltog a dagos a nakatayan dagiti dua a staff members ti embahada.
Segun pay kenni Smith, ipukpukkaw ti suspek ti linyada a “Free Free Palestine” kabayatan ti kaadda na iti kustodiya da.
Kinuna met ni Israeli Ambassador to the US Yechiel Leiter a dagiti natay a dua nga staff members ket young couple a nakatuding kuman ti engagement da agsipud ta ti lalaki ket nakaplanon nga ag-propose iti nobya na idiay Jerusalem inton sumaruno a lawas.
Kabayatanna, nangipadanon metten iti pannakiladingit ni US President Donald Tump kadagiti pamilya ti biktima nga Israelita.
Kinondenar ni Trump ti napasamak ken kinunana a nasken nga agibusen ti pammapatay sadiay District of Columbia a nalawag a nagtaud iti nakaro a panaggura kadagiti Hudyo. Inwaragawag ti Presidente nga awan iti lugar ti nasao a radikalismo idiay Estados Unidos.
