Saan a bumaba ti dua nga indibidual bayat a nadundunor dagiti sangapulo ket pito a sabsabali pay iti napasamak a pammaltog idiay Minneapolis, dua nga aldaw kalpasan ti panagrugi iti klase ti Annunciation Catholic School – maysa nga elementary school nga addaan ti tallo gasut siyam a pulo ket lima nga estudyante a konektado ti Roman Catholic Church.
Manipud kadagiti sangapulo ket pito a nadundunor, sangapulo ket uppat kadakuada ket pasig nga ubbing, ken agtawen laeng ti otso ken dyis dagiti naipadamag a pimmusay.
Segun kadagiti otoridad, nagpalto-paltog ti suspek iti tawa kabayatan iti maisaysayangkat a misa iti nadakamat a pagadalan ken imet na iti maysa a rifle, shotgun, ken maysa a pistol.
Nabigbig iti suspek a managan Robin Westman, baente tres anyos, ken residente ti Richfield, Minnesota. Kalpasan ti inaramid na a krimen ket nagpakamatay met laeng daytoy.
Maibasar iti online database ken ti achieve version ti school staff page, nagtrabaho idi iti ina ni Westman iti Anunciation Church kas maysa nga administrative assistant ken sinelebraran na iti panagretiro idi 2021.
Nagkedked met ti pamilya nga agkomento seknan ti napasamak nga insidente.#
