Impannakkel ti Eastern Mindanao Command (EastMinCom) ti balligi da iti tay-ak ti panangparmek ti insurhensya kabayatan ti panagrambak da ti maika-19 nga anibersaryo ti idi kalman, Agosto 28.
Naipaganetget iti selebrasyon ti dedikasyon ken awan sarday a trabaho ti command tapno magun-od ti kinakapia ken seguridad ti rehiyon idiay Eastern Mindanao.
Inbinglay ni EastMinCom Commander Lt. Gen. Luis Rex Bergante iti panagbetla na dagiti detalyado a resulta dagiti operasyon da kontra kadagiti rebelde a grupo.
Imbida na ti balligi ti EastMinCom a nakapagpa-surrender,nakatiliw, ken nakapatay ti aganay 894 a miembro ti Communist-Terrorist Group (CTG) manipud kadagiti 82 a military operations kadagiti nagduduma a paset ti nakadutokan da.
Malaksid iti dayta ket nakarekobre pay ti tropa ti aganay 498 nga armas a segun kenni Bergante ket nakaro a mangpakapsot ti puersa dagiti rebelde a mangisayangkat ti aramid a kinadamsak.
Nakissayan payen ti kabaelan dagiti terorista a grupo tapno manggulo ken mangiwaras ti pammutbuteng kadagiti komunidad. Kas resulta ket nagbalinen a nataltalna ti panagbiag dagiti tattao idiay Eastern Mindanao.
Ti balligi ti EastComm ket pakairamanan ti pananaka-dismantle da ti maysa a Guerilla Front, uppat a Vertical Unit ti New People’s Army (NPA), ken dua pay a Sub-Regional Committees ti grupo a Komisyon Mindanao.
