Nag-apela ni Eastern Samar Governor Ben Evardone iti gobierno a mangitukon ti subsidiya para para ti transportasyon dagiti produkto nga agturong kadagiti nagduduma a probinsya nu kasta ket maliklikan ti panagngato ti presyo dagiti magagatang.
Daitoy ket kasaruno ti panangipatungpal ti three-ton load limit sadiay San Juanico Bridge gapo kadagiti isyu ti kaledad ti rangtay a mangkonkonektar ti Samar ken Leyte.
Imbatad ni Evardone a nasken a sungbatan ti gobierno ti bayad dagiti Roll-on/Roll-off (RoRo) transport kadagiti produkto, nangruna ta ad-adayo ken nagastos itan ti ruta nga agturong sadiay Calbayog ken Catbalogan a danonen ti uppat agingga walo nga oras.
Nupay agtaltalinaed a normal ti presyo dagiti magagatang iti agdama, segun iti Department of Trade and Industry, nagpakdaar ni Evardone a posible a ngumato daitoy kadagiti sumaganad nga inventory agsipud ta maib-ibusen ti sigud a stock dagiti produkto.
Kiniddaw ti gobernador nga agderetso dagiti RoRo vessels kadagiti sangladan idiay Borongan ken Guiuan tapno napartak ti diskarga ti supply.
Kabayatanna, nakapangato ti blue alert status ti Office of Civil Defense ken Regional Disaster Risk Reduction and Management Council (RDRRMC) iti rehiyon bayat nga adda met iti state of emergency itan ti probinsya ti Samar gapo ti epekto ti load limit.
